Rainsipper's space

打死都唔做運動員

Thu, 21 Aug 2008 17:46:37 GMT

今日早左同老闆去樓下茶茶餐廳食Lunch，一入去正好播緊奧運乒乓球，仲係高禮澤對上屆冠軍柳承敏。

咁正！即刻坐低，叫碟炒烏冬，實行奧運送飯。

話說阿澤已經領先2:0，不過同時不善打(太)順境或者逆境波o既港隊開始有D失準，連失兩局慘被扳平之際，茶餐廳經已「吊」聲載道。去到第五局，雙方出現膠著狀態，我地作為觀眾當然睇得既肉緊，又心急之際，阿澤又失一球！此時，隔離檯個阿叔幽幽地講左一句：~~~~~

~~~~「真係徙米飯！」~~~~

嘩！使唔使呀，人地寒窗苦練，兼且對住上屆冠軍，唔使去到咁盡下話。正所謂「場上一分鐘，場下十年功」，阿澤付出幾多你又知幾多呀？人地能夠企得o係奧運呢個舞台上，已經係萬難o既光榮事。而你D咁o既阿叔，咬住牙簽，隨意吹一句咁涼薄o既說話，我真係戥你同呢你o既下一代悲哀！

好彩我無本事，呢世都唔會上電視打波。如果有next life，保佑我唔好做運動員，至少唔好做香港運動員！

是日妙問妙答 - 智破唔守規舉阿嬋

Tue, 12 Aug 2008 13:47:11 GMT

我一世最Q憎人唔守規舉，尤其是o個D斷正左仲要阿支阿JOR o個D人。日日都有人打家劫舍啦，又唔見你班阿嬋去做。好彩我亞媽自細唔係咁教我姐。

阿嬋：點解佢都係每日UP兩次, 妳地都唔理佢既, 我都係有時先UP兩次姐~~希望妳地可公平D囉~~
(UP文即是發帖者在短時間內回覆自己的題目，令文章獲得較好的排名)

站長：我們刪文主要是透過抽查及舉報，試問會天洋洋數萬新文章，真的能逐一審查麼？希望您明白人家犯規並不等如您亦能犯的道理。我們已經十分緊貼會員的舉報，如有發現甚麼不對的儘管舉報，我們會盡快處理的，謝謝。

阿嬋：我明白~~, 所以我依家未"舉報"囉, 我都係以為係得, 所以都係學人咋, 點知係我唔好彩, 次次妳地都知, 而人地那些就唔知囉, 不過唔緊要啦, 尋日我睇電視, 原來依家都有好多呢D網, 我希望其他會公平D囉..
(真係好學唔學，又唔見你學下D守規舉o既，好心斷正就唔好咋諦啦，企定自修三件咪算囉。拿拿拿，又兇我喇，咁叻咪睇多D其他網囉，您都係賣野搵食，去到邊都係落得刪文下場)

站長：我們深信有競爭才會有進步，相信這樣會驅使我們做得更好。
(無辦法，又唔爆得粗。對付呢D阿嬋，一定要激)

阿嬋：當然啦, 有競爭才人知邊個高低啦, 不過妳唔使再覆PM啦, 因我唔會再上了..THX..
(唔夠人講咪唔上囉，個個都係咁，無黎挑戰性，出律師信告我丫笨！不過我欣賞你句THX..潑婦得黎有返D風度)

Toe Concert @ Grappa's Celler

Fri, 08 Aug 2008 08:04:44 GMT

Mathematical Rock，TOE表演的就是Math Rock。

長篇的，充滿實驗性質的，節奏毫無章法的，樂章充滿稜角的，就是Math Rock。

最近朋友阿雪推介了這支樂隊。本來我對Instrumental的興趣不大，沒有Vocal的音樂聽起來總是感覺soulless，不過看過阿雪傳過來的youtube片段後，被樂隊的技巧吸引住，四位成員演奏時各自發出自身的光芒，彌補了沒有Vocal的空虛。

Concert在康樂大廈地庫的Grappa's Celler舉行，本來打算和女友早一點都那兒晚膳，順便佔個有利的位置。無奈餐廳重門深鎖，只好到Exchange Square那邊的Sapporo吃客冷麵，然後回去乖乖的排隊吧! 幸好回去時阿雪先幫我們排了隊，入場後大多人都只顧取飲品(門票包一杯飲料)，不一會我們便弄到台前的位置。

大型的音樂會我聽慣了，可是小型的卻不多，而站在Stage的最前面更是第一次。阿雪在這方面是識途老馬，連忙遞上紙巾，好讓我們充當耳塞，免得幾小時的高壓聲浪令耳朵受罪。紙巾十分管用，完場後聽覺絲毫無損，不過感覺像是某部份人聲被過慮掉，幸好Vocal只限在Warm Up部分，沒影響到Feature show，看來下一次還是要準備一對好的隔音耳棉，減掉20分貝應該足夠了。

阿雪跟我都是影友，早已帶齊裝備。難得拿到好位置，整個晚上大家都忙過不停拍照。大家都是愛音樂的人，同樣覺得Artist在表演的一刻是最迷人的。她的裝備比我好，中途也不吝嗇交換鏡頭，讓我在極度欠決燈光的情況下也能拍得一些較好的照片。一個晚上，不經不覺把4GB的記憶卡塞得滿滿的。

Warm Up部份由本地Indie樂隊Lovesong包辦。Lovesong早已在NIN的Concert擔任Warm Up，實力不容置疑。30分鐘後終於戲肉出場了，Toe四位成員先後踏上台板，接下來接近兩小時的演出全無冷場，高超的技巧和演出者的投入都能牽動聆聽者的心弦！最後三首歌是Acoustic Session，吉他手Yamazaki換上木結他，奏到グッドバイ(Goodbye)更自彈自唱，是全場的高潮！

很多人都會拿Math Rock跟Post Rock作為比較，甚至將Math Rock歸納於Post Rock的一類。畢竟個人音樂造詣有限，要具體談論兩者分別恐怕力有所不遞。不過從單純的聽感而言，我還是覺得Math Rock較為討好一點，就時那種輕鬆愉悅的旋律，但又不失Attack，加上近似Jazz的即興演出，實在令人回味無窮。

無人的演奏

Mon, 14 Jul 2008 15:35:54 GMT

這個週末，下載了家駒的「弦續」。

本來Beyond的作品絕對是值得真金白銀購買的，可是近年魚目混珠的雜錦碟充斥市面，對於這屢「復刻」作品總有一點戒心，還是先下載，聽過覺得好的，才去購買吧(後來我還是買了)。對於好的音樂，我還是十分支持正版的。

十五年前的一個下午，我聽著「灰色軌跡」，不禁流下淚來。剩下三子的Beyond，我也捧場了不少年頭。可是不知從那天起，我原全投身歐美音樂，把他們拋諸腦後。加上拆夥後，音樂取向更跟以前大相逕庭，提不起收聽的興趣。

這個晚上，我戰戰兢兢的打開下載的檔案，iTunes先傳來家強Cover的好幾支歌，感覺相當不錯。「他的結他」大賣兄弟情，「We are the People」及「奧林匹克」都帶有濃列的早期Beyond色彩。「無人的演奏」是派台作品，是唱片的Theme Song。個人不太喜歡電結他的變調，覺得是嬌柔做作之舉，可是應用在「結局」中卻出奇的Moody，感覺特別配合，而這曲亦是我全碟最愛的一Cut。

聽過家強的Cover，便聽家駒的Demo。畢竟人不在，聲音才是最可貴，家駒、John Lennon、Kurt Cobain、陳百強、哥哥、Ray Charles.... 他們多麼的教人懷念，聽著他們的歌，聲音仿如隔世，所有的美好彷彿就凝結在一刻，隨著音樂飄揚，直到天荒地老，多麼的令人沉醉。

「只有無聲的歲月裡... 無人的演奏...」 Demo歌曲未被填詞，聽著家駒啦啦聲的唱著，伴隨著原始的嗓音，腦海浮現著一幅幅錄音室的畫面：坐在結他Amp旁的家駒，按動卡帶的錄音鍵，徐徐彈起這些歌曲。不論是歌者的表情，或是撥弦的手，一下子清晰起來，但下一秒卻又全然模糊，可知此一刻，我的心是多麼的激動！15年的別離，這樣的相遇，實在有點難受吧！

天亮了，耳機繼續傳來「啦啦...啦啦...」的歌聲，這一刻我相眼通紅，我多麼，多麼的渴望，家駒，你唱一首歌吧，那怕是一句也已經足夠。

悼程老先生

Wed, 09 Jul 2008 15:31:08 GMT

今天得知程老先生的死訊，不禁悲從中來，生死雖有命，可是對於強壯的程老先生來說，也是太突然吧。

肥強是我的小學同學，家族經營三行。三行最重視時節，每逢魯班先師誕辰，或是中秋團年，定必大排延席，不論經濟起跌，過去數十年，從不間斷。由於我跟肥強的感情深厚，自小學畢業後，定必為座上客，跟程家的親朋戚友，大快朵頤。

畢竟輩份不同，跟程老先生的交流不多，可是見面是他定必向我大叫一聲「龍仔」，聲如洪鐘，響遍宴會大堂。他閒時喜愛賭兩手，晚宴定必設局，玩些三公或是甚麼的。還記得有一年他手風頗順，大殺四方，拿著一大疊鈔票，給席上每位小孩派錢。三數百不算是甚麼大數目，可是他的豪氣，可見一班！

三年前的飯局中，看見他的手包札了，上前問候一下，程夫人說他開工時為救伙記弄傷的。人家從三樓失足墮下，他就在一樓把墜下的伙記單手接住，救了人家一命，可是自己的膊骼卻骨折了。

聽說程老先生是在工作時出意外的，安全措施做得嚴實，可是人算不如天算，安全帶扣上的地方鬆脫，這種意外，任誰都不能途避。

在我眼中，程老先生彷如現代張飛，不論性格外型，無一跟史書不符。

死者已矣，望程老先生能夠安息，親友們亦早日釋懷。特以黜文記下程老先生的一點事，讓大家知道您也曾經活得精彩過。

P.S. 今晚彈唱了Lonely Day，送給程老先生及肥強，最後一句「Its a day that I'm glad I survived」正是我想表達的，無論經歷甚麼，最重要是真惜眼前擁有的。

是日戰況：老本夠用

Wed, 09 Jul 2008 14:46:35 GMT

地點：Fitness First
時間：8:34 pm
跑左：1 hr
距離：10 km
燒左：662 Kcal
鞋：Rider
Year to End Mileage：258km
Year to End Calories：17803

上個星期超忙，加上一年一度Wimbledon，加埋UEFA同埋F1，晚晚睇完波朝早仲要準時返工。雖然我係老闆，但係做得到o既我都唔想break the rule，能夠準時返o既我會盡力。

今個星期終於閒返些少，屈指一算差唔多吞左兩個星期pop，所以今晚立即去跑。咁耐無跑，我都好驚跑唔郁，於是set慢少少，9.5k起錶，希望跑到一個鐘。頭15分鐘跑得有d吃力，不過半個鐘左右就開始回氣，慢慢跑快些少，最後不停loop住「Bitter End」，結果1個鐘跑晒10K，估唔到老本仲夠用。

炎夏中令人感動的網球

Thu, 03 Jul 2008 12:40:45 GMT

十一年前，沒有電視轉播，單從報章得知伊達公子打入溫布頓四強，已經非常感動。感動的不單是伊達是亞州人，更重要的是，亞州人能夠在這個被歐美球員統治的運動中佔得一席位，那怕是那麼短暫的一刻！

十一年後，我在電視看到鄭潔打球，嬌小的身軀牽動著有力的抽擊，那種震憾，試問由那位中國人不能感受得到！

我期望，那只獎杯的懸念，還是留待星期六才揭盅吧！

是日戰況：法證先鋒真人版

Thu, 26 Jun 2008 15:21:02 GMT

地點：Fitness First
時間：8:19 pm
跑左：55:34 min
距離：9 km
燒左：640 Kcal
鞋：Rider
Year to End Mileage：248km
Year to End Calories：17141

今日有mood又有時間，一於Back to back落FF跑多轉。

話晒mileage唔高，我都唔咁搏命，由9.5K慢慢跑。隔離個老外跑快我DD，不過跑跑下就「蛇型走行」，o係條Belt上面zig zag咁走，真係頂癮！

跑完落去changing rooms時見到兩個PC，睇怕都係有人比人爆locker。沖涼前見到個PC同個經理傾緊，沖完涼就有個貌有8成似唐文龍o既CID坐左o係度jog note，Forensic亦o係個locker度掃指模。不過現實世界o既法證係牛記笠記，唔係好似Bobby咁西裝骨骨囉。

是日戰況：三號波照跑

Wed, 25 Jun 2008 14:50:57 GMT

地點：Fitness First
時間：8:20 pm
跑左：47:07 min
距離：8 km
燒左：581 Kcal
鞋：Rider
Year to End Mileage：239km
Year to End Calories：16501

最近越黎越難free時間去跑步，所以今晚一有時間，就即刻撲落去FF。

今晚FF都唔少人，新o個批Treadmill全部都有人跑緊，我見有個姐仔企左o係部機上面又唔跑，淨係o係度拉筋，於時行黎行去擾攘下，終於逼走左佢(yeah!)。左右兩邊都係老外，兩個都跑得好快，右邊o個個鬼婆好似裝左摩打咁喪跑，我都比電兔搞high左，11K起錶。

跑左3K左右，電兔相繼離場，我立即後勁不繼，set返去10K速度。最後跑夠8K收工。跑完又順便舉野，不過好似我做gym做得咁疏o既都唔知舉黎有乜用？Anyway有得舉就舉下啦。

最近做左個壹仔訪問，個記者好岩傾，難得大家都鐘意Britpop。我呢D中坑身邊想搵個知音人都好難，本來大家無乜幾句，但一講起Radiohead、Coldplay、Placebo...即刻上身，好似識左好內一樣！我畢業之後就無聽JPOP，佢推介左Tokyo Incidents，我好快就揀到隻「遭難」，今晚以經喪loop，果然無介紹錯。

是日戰況：邪

Wed, 18 Jun 2008 15:50:51 GMT

地點：Fitness First
時間：7:56 pm
跑左：47:40 min
距離：8 km
燒左：500 Kcal
鞋：Kayano
Year to End Mileage：231km
Year to End Calories：15920

我個人唔信邪，邪對我黎講，只係unlucky o既意思。

呢兩個星期係計火燭之後最tough o既日子，公司多事發生，Server又死，最濕滯係上個星期有日屋企廁所個水箱爆左，我又返左工，結果又浸左1/3間屋，D水繼而留出屋外(好彩係屋外)，又浸滿左個電梯槽。

好彩已經見過大蛇，大部份重要家具都係離地o既，唔係的話又算失慘重！家陣只係地版有D谷起左，不過燕梳應該cover。

Weekend要做function，結果無得抖又無得跑，呢個星期個System又死死下，我心情直插谷底。今日稍有起色我個人亦同時稍有起色。放工時雖然都係得半條人命，但為左physical and mental health，我都去左跑一轉。

跑兩野就覺得腳軟，唯有set平晒部機跑啦。隔離好彩有電兔，唔經唔覺一齊跑快左，再加上遠處有靚女做伸展運動，時間一下子變得更快，唔經唔覺就跑左8K。

今晚+1要開夜，過左去接放工，順道行左轉HMV。呢排忙到連Coldplay隻新碟都無時間買(我又唔想download)，眼見港版$99，EU版不過多6蚊，即刻EU版入手。順手買埋今期本Q Magazine，貪佢送隻Glastonbury Festival專輯。比錢時仲有海報送，兼且有獎抽，正！

是日戰況：不顧一切的跑

Tue, 10 Jun 2008 15:56:33 GMT

地點：Fitness First
時間：9:03 pm
跑左：51:31 min
距離：8.5 km
燒左：550 Kcal
鞋：Kayano
Year to End Mileage：223km
Year to End Calories：15420

經過黑雨一役，再加上long weekend，今日堆起左無數o既工作，做完時差唔多夜晚八點。

今晚本來plan左好多野做，又要打機(weekend買左GRID)，又想彈琴(尋晚咁岩得咁橋搵到曹格「背叛」個譜)，於是打算求其玩下Wiifit算數。

起晒壇準備玩o個一煞，我實在忍唔住，忍唔住做埋晒呢D low intensity o既運動，都未夠九點，不如玩黎真，即刻換衫，衝落去FF。

呢排鐘意睇住電視跑，不過唔好o既地方係，電視機前面o個排跑步機係舊款，無build in風扇，所以跑得快o個陣會爆熱！o係街跑都有D風丫，但係o係Gym當你o既體搵突破左冷氣o既製冷之後，無風的話其實係超熱！不過算喇，食得鹹魚抵得渴，要睇「師奶股神」就要有D犧牲架喇。

先跑7.5K，用左45分鐘，然後慢跑多1K收工，都算OK啦。

就快又到賽季，雖然我都係打算賽三場，不過都唔歎得幾耐喇。

黑雨

Sun, 08 Jun 2008 10:45:02 GMT

昨天黑雨，海味街水浸已是指定動作，不過親歷其景卻是第一次。早上七時正值最大雨的時間，海味店雖然如臨大敵，可是誰能抵擋得住天災？

看著幾乎及腰的積水，除了無奈，相信亦只得無奈。

是日戰況：Fear Factor

Tue, 03 Jun 2008 15:55:33 GMT

地點：Fitness First
時間：8:42 pm
跑左：59:47 min
距離：9.5 km
燒左：660 Kcal
鞋：Kayano
Year to End Mileage：215km
Year to End Calories：14870

今日又早左創舉，尋晚返得5粒鐘今朝倒塔咁早起身撲上去廣州，今晚落返黎竟然有力去跑步。

無他o既，我今日進補過，仲係好補o個隻。上親廣州，例牌要同二哥刷一餐，今日二哥點左個「沙蟲魚肚勝瓜湯」！沙蟲！？無錯，係釣魚o個隻沙蟲，不過係灰灰地色o既，煮熟左係白色。

坦白講，我係後來先見到D活生生o既沙蟲，否則我可能會唔食！唔係講笑，真係蚯蚓咁大碌架！

二哥一落單，我腦海就浮現左電視上面「Fear Factor」一幕幕嘔心o既食蟲畫面！我睇親Fear Factor都會諗，換著係我我夠唔夠膽玩？我肯定唔敢玩，不過呢D畫面的確幫我壯下膽，人地生o既都食，煮熟左我怕咩呀？

上菜時，先飲啖湯，味道超甜！通常呢D高protein o既食物都係鮮甜o既。眼見Winson都照啪蟲，我亦為善不甘後人，兜野成條隊入口！入左口又唔係好恐怖，味道同口感都同金針非常相似。雖然係eatable，不過當然係無添食啦。

又差唔多兩個星期無跑，今晚目標係跑一粒鐘，為左達到目標，我只係跑9.5K/hr，結果真係一粒鐘，過程唔算好辛苦，我都好滿意。

收工後去惠康入貨，睇下D Perrier，嘩！成廿皮一支，當年我仲係大少o個陣o係屋企淨係飲Perrier當水都不過係9蚊一支，唉~~真係通脹迫人。Citysuper買支Badoit都係17蚊，個人推介，好過飲San Pellegrino，同埋法國人都唔飲Perrier o既。

妙問妙答之騎呢小學同學篇

Tue, 03 Jun 2008 12:11:16 GMT

熟我o既人大概都知到我有個好頂癮o既騎呢小學同學。自從我o係渣打擊敗左佢之後就無再o係我面前同我講跑步喇。我同呢條友無來往，不過有一次佢問我拎電話，我又竟然比左佢....

早幾個星期前，佢開始打比我，我對呢D騎呢人一向早有準備，電話一定入晒phone book，make sure打黎o個陣時會有caller ID比我選擇唔接。開頭我諗住佢可能會問我借錢，所以例牌唔接。

但係佢每個星期都打一次過黎，睇怕真係要借錢的話都破左產喇。當我rule out左借錢o既可能性，覺得呢個call可能會醞釀無限笑料，所以尋晚佢打黎o個陣時，我就膽粗粗接左喇。

讀書篇

騎：「你o係外國讀書，即係邊度讀呀？」
我：「加拿大囉。」
騎：「加拿大邊度呀？」
我：「Toronto附近啦。」
騎：「點解揀加拿大呀？」
我：「學費平囉。」
騎：「咁澳洲唔平咩？」(我大概估到佢之後想講乜)
我：「澳洲D U屎丫嘛！」(我只係有意冒犯佢，無意冒犯各位澳洲書友)
騎：「............」
騎：「我加陣讀緊....(下刪45秒對話)..... 今年畢業喇！」

結論係：大哥呀，我o個兩個爛鬼degree都拎左十九幾年，公司裡面又Master又PhD，見工的話份CV唔寫Education都有人見啦，好心就唔好見親面都講先得架。

同埋，我個Degree係經過寒窗苦讀(雖然成日走堂)，學校又係top school，唔該唔好用你o個D所謂「最緊要畢到業」o既Degree同我比，我會look down你。

職業篇

騎：「講開又講，你做咩架？」
我：「我做IT架。咁你呢？」
騎：「都係做marketing o個D。」
騎：「你成日返大陸架？」(事原我有一次o係紅磡隧巴站見到佢)
我：「一個星期一兩次啦。」
騎：「我睇你都係打工姐。」(乜打工有樣睇o既咩？)
我：「都係咁上下啦。」
騎：「IT呢瓣餓唔死人o既，我都有好多friend做IT(我真係懷疑你有幾多個friend)，搵到o既就無喇，不過穩穩定定o既都無問題o既。」(........)

召妓篇

騎：「話時話，你有無出去搞下野架？」(指召妓)
我：「無喎。」
騎：「我都無喇，修心養性喇。」

雖然「世上無唔食魚o既貓」，我都係用下體思考o既普通男人。不過我個norm裡面真係無朋友會召妓囉(真係有的話都唔會咁open囉)。我個人有潔癖，唔會做呢D事，sorry，entertain唔到你。

溝女篇

騎：「我最近呢，睇中左條女，約左佢幾次出黎，佢都唔出！」(正常過我買親六合彩都唔中丫)
我：「同學黎架？」
騎：「係呀，讀degree D同學，以前幫佢就出黎，家陣唔同course就約極都唔出喇。」(都好正常丫)
騎：「咁你話同唔同佢表白好喇？」
我：「呢D野咁personal，自己決定啦。」
騎：「同佢講都好呀，起碼得個知字丫！」(不如你問我，我話你知好過啦)

騎：「家陣D女係咪3字頭都會渴D o既呢？」
我：「都唔一定o既。」
騎：「不過真係估唔到佢都三字頭....」
騎：「哈哈，話時話佢都幾索架！」
我：「...........」

騎：「你點約你條女出黎架？」
我：「咪就咁約囉。」
騎：「咁你約幾多次先成功丫？」
我：「無話約幾多次個播，約咪出黎囉！」(懶醒！)
騎：「...........」
騎：「咁你點約丫？」
我：「都話就咁約出黎咯。」

騎：「你話我似唔似無女朋友丫？」(真係無得頂)
我：「呢D野無樣睇o既」
騎：「你話你最初見到我o個陣時有無諗過我無女朋友架！？」
我：「...........」

如果我係女的話，我定必選擇成為「乾物女」都唔會同你搭上。一句講晒：「點解我咁靚仔竟然會甩頭髮？你地咁樣衰竟然冇甩頭髮？」吹脹！

Show Report: Keren Ann Live in Hong Kong - 以聲繪影

Thu, 22 May 2008 15:42:24 GMT

(本文於5月19日完成，為響應國家哀悼日，娛樂題材暫停，延至是日推出)

那天晚上，我放下了國仇家恨，甚麼家樂福、François Fillon、抵制奧運，暫時全被拋諸腦後，我要的是完完全全的音樂表演。

已忘記了是怎樣認識Keren Ann的，但當日我捨棄下載，在HMV付出$140購買了她的CD，就知到我對這位歌手的鐘愛。

個人不愛Soft rock，但Keren深沉而帶有田園色彩的聲音卻深深吸引著我。加上有點psychedelic的arrangement，聽上數遍也不會感到厭膩。Keren Ann的專輯中，我最喜愛Nolita。專輯中英語歌和法文歌平分天下，個人比較喜歡法語部份，覺得演譯得比英文的更感情豐富。

亂打亂撞的購了票(開售一天便沽清，真幸運啊！)，等了個多月，終於到了演出當日。上環文娛中心確實不是個Classy的場地，不果劇院卻是專業的，場地吸音及acoustics肯定要比Asia World Arena好得多。

一如意料，舞台出奇地簡陋，燈光幾乎欠奉。不過我要的只是音樂，而簡約的setting卻令我想起Fringe Club的Live Gig，情緒也隨之而高漲起來。Feature Performance固然精彩絕倫，Encore部份才是真正的戲肉，Keren先跟樂隊演出了Joni Mitchell的「Big yellow Taxi」，繼而躲進後台。只見燈光未亮，全場樂迷一再起哄，Keren只好再踏台板，並要求關掉台上所有燈光，清唱了「Manha De Carnival」。那種穿透漆黑死夕，直滲耳道的清澈嗓音，那一種震憾，是我從來未感受過的。

散場時花了10塊錢買了張海報，看過EMI櫃位擺放的Keren Ann專集，發覺全是Made in EU的，也買了她出道的第一張CD，才花過100大洋。EMI的朋友還說稍後會有Meet and Greet Session，看看未有型成人龍，我就像個小Fans般乖乖拿著唱片和海報排起隊來。

「以聲繪影」的意境太高了，套用在今次的音樂會實在有點overdone，畢竟是soft rock滲進了一點country吧。不過我並非否定Keren的歌藝或是演唱會的質素，實話實說，我愛死這場音樂會！

作為納稅人，我經常對未能享用政府福利已有所微言，但今次我打從心底裡感謝康文署和French Consolate。沒有他們的贊助和安排，相信很難有機會在港欣賞到這麼non-commercial，清如泉水的演出。

寫到最後，想起Keren Ann身上也散發著一仲東方女性的美，或許這是我喜歡她的原因吧。

P.S. 事後蘋果報導指Keren Ann是「少女歌手」，其實她還要比我年長半年，天啊，險變中坑的我還有平反機會，事實是我比她年輕半載。

是日戰況：散跑王

Thu, 22 May 2008 15:41:08 GMT

地點：Fitness First
時間：8:49 pm
跑左：47:50 min
距離：7.5 km
燒左：551 Kcal
鞋：Kayano
Year to End Mileage：206km
Year to End Calories：14210

真係越黎越懶散，越跑越疏，無他，呢排買左Wiifit，係屋企無聊就喪玩。Wiifit呢家野你要玩佢玩到Fit睇怕幾難喇，不過根據我o既經驗，倘若你肯喪做i.e.每日玩粒半鐘兼且齋攻呼拉圈同原地跑的話，呢D low intensity運動對減肥同埋body toning或多或少係有效架。

不過唔跑由自可，一跑就知到Wiifit同真正o既運動，係天同地o既事！

今日先用半個鐘跑5K，跑完已經腳軟軟，之後再求其舉左幾野鐵。今日又有新搞作，就係玩溜冰機，平日見人地撐撐下好似好疏乎咁，點知踩左幾分鐘就知賴野。本來已經腳軟，家陣直頭腳震！

最後去返跑步機慢慢jog hill program，跑多2.5k收工。

想念都江堰

Wed, 14 May 2008 15:48:50 GMT

沙士的那年，我跟父母參加了$999的救市團，到成都玩了四天。

除了辣得汗珠直冒的麻辣豬紅和宏偉的樂山大佛，至今還有深刻印像的，就是都江郾。

都江堰位於成都以東70公里，是著名的景區。整個景區開發得不錯，是難得的沒有被過份商業化的旅遊項目。都江堰是的古代水利工程，原名為都安堰，宋元后称都江堰。都江堰建於公元三世纪，是全球至今為止，年代最久且一直沿用至今的水利工程。都江堰採用了無壩引水技術，2200多年来，一直為四川居民默默服務，從不間斷。

都江堰的水利項目相當偉大，當中的「飛沙堰」和「魚咀分水堤」都是值得參觀的地方。要一併把所有美好的風光盡收眼底，最好是登高一點，在山上的二王廟遠眺。居高臨下，才能感受到都江郾的磅礡氣勢。

數都江郾景點，我的最愛使安瀾索橋。安瀾索橋全長240米，貫通岷江南北，是古代四川西部與阿壩之間的商業要道，是藏、漢、疆族人民的聯系紐帶。原來的橋是不折不扣的索橋，但現在已被水泥加固，失去了原有的味道。但站在洶洶的河水上，橋還是相當壯觀的。風景看得出神，還有一刻幻想到會有輕功大俠出現，輕點索橋騰飛！

前天在電視上看到成都地震的慘況，坦白說，我心痛了！這麼美的地方，不過一刻光景，成為成千上萬寶貴生命的墳墓。報章上一幅幅痛苦的圖片、螢幕上一幕幕彷如人間煉獄，看過後誰能不動容！

匆匆在週二的例會中著同事準備呼籲網民捐款賑災，也跟拍檔商量好，捐獻公司的一些收入。最後當然要中港兩地同事同心響應，總之大家都要略盡綿力。

希望都江堰及其他受災地區盡快重建。他日定會再度踏足，重溫惜日的美好回憶。

Medical Treatment

Fri, 09 May 2008 10:30:22 GMT

今天看了兩次大夫，嚴格來說，是一次半。因為要先抽血，待下週結果出來時才會見醫生。

本來年初就要見醫生，奈何我對任何medical treatment都極度恐慌，除了吃藥，其他的可免則免。拖無可拖唯有硬著頭皮走進醫務所。

Treatment故然恐怖，當中Intrusive比non-intrusive的更為嚇人。就連抽血等小事也夠令我心跳加速一個早上。幸好近年抽血次數多了，雖然仍十分感冒，但總算漸漸習慣起來。

抽血其實是一件好玩的事，眼見護士把針插進手臂，那種尖刺的痛故然很難接受，但看著她熟手的把針筒一拉，血液未被抽出，針筒內部處於真空狀態的一剎，彷彿時間停頓了下來，任誰也摒住了呼吸。此時此刻，往往會從某處傳來了一陣病態的快感，就是那種渴望看到鮮血的期待，令我心神著迷。其後血如泉湧的一刻，仍然教人興奮！但快活過後，換來的是無盡的焦慮，姑娘，請你還是快點完事吧！

一般情況下抽血過程大都是順利的，可是今天卻出了個小意外。針已死死的扎進了手臂，我心中也暗揣著最可怕的情況已經過去，無奈護士竟然說：「你的血液可能太稠，一下子把針管塞住了，還是拿另一只膊胳再試吧！」

「.....」晴天霹靂，又要重新感受一次恐懼。

口腔內莫明的發腫，腫的十分利害，痛得連早餐的麵包也得花上一句鐘才能勉強哽下。為免影響週末的情緒，抽過血後，還是另外找位牙醫看看。由於發炎位置於大牙後面，恐防有出智慧齒之嫌大夫還是建議用X光確認一下。

X光是另一樣我最厭惡的Medical treatment，無色無味無痛無臭確實不會令人生厭，無奈每次進行放射時醫生護士定必雞飛狗走。而我獨留在房間時，面對著看不見的輻射，害怕的不是X光會殺死多少細胞，而是那種不能預知和被遺棄的感覺。

不論怎樣，我的諱疾忌醫惡習已是無可救藥，不用相士批命，我也清楚，他日我大概會是失救而死。

是日戰況：Die for Free Magazine

Wed, 07 May 2008 14:51:43 GMT

地點：Fitness First
時間：8:59 pm
跑左：39:51 min
距離：7 km
燒左：370 Kcal
鞋：Kayano
Year to End Mileage：198km
Year to End Calories：13659

今日晏左收工，所以都晏左落FF。行過去時有幾分唔想辛苦，有一刻諗過不如慢慢jog算喇，不過一行上跑步機，就死都唔想jog，話晒咁辛苦擺脫惰性，無理由要jog，一開始就set 10k/hr，每三分鐘加0.1k，跑到7K收工，跟住舉野。

我勁鐘意睇free mag，當中以「Beats」為賣飛佛！開跑前o係Lobby見到有一千零一本，跑完後竟然唔記得拎！沖沖下涼突然間醒起，立即急急抹身出去睇下仲有無，好彩呢個世界得我咁cheap吼埋D咁o既野，拿拿臨拎起走人。

P.S. 終於證實Graze改左收9點，睇黎同我呢個熟客緣盡喇。

是日戰況：我要做Yawns

Sun, 04 May 2008 14:50:52 GMT

地點：Fitness First
時間：5:33 pm
跑左：45:03 min
距離：8 km
燒左：521 Kcal
鞋：Kayano
Year to End Mileage：191km
Year to End Calories：13289

理論上今日係scheduled run... 不過下晝約左Andy比D野佢，但係佢又晏左，所以一早已經變成左「Scheduled non run」，不過Andy過黎o個陣剛好5點半，反正都要落去MTR見佢，一於換埋衫，跑得幾多得幾多。

先跑5K，然後舉左陣野，再跑多3K。個人狀態約得舊年七八成，不過同早排比就順返好多喇。

沖完涼又見到個阿叔「吹頭」。我換晒衫，著晒鞋，仲用埋Q-tip清耳仔，o個位大叔仲o係度喪吹！歸納過去一年所見o既「吹頭」事件，最後我悟出一個結論，點解大叔咁Q鐘意吹身：就係佢地怕風濕！

我地後生未有風濕威脅，所以唔會吹身。

搭車返娘家吃晚飯時讀usatoday。頭條係「Yawns: Rich and young, but frugal」，Yawns (Young and Wealthy, but normal)可以話係繼Yuppies之後一個generation/cultural revolution，亦都唔係一個陌生字眼，不過段故事幾inspiring。我認為世界無得救，基本上係死硬，不過有0.1%可以自救的話我都願意做一D事幫下手。自問無老外咁有Guts，以最重要係，Yawns的大前提係Wealthy！

Photo Album: Beijing 2008

Fri, 25 Apr 2008 15:07:38 GMT

Beijing 2008

100_2323

IMG_2168

IMG_2172

IMG_2176

IMG_2180

IMG_2181

IMG_2195

IMG_2207

IMG_2208

IMG_2220

More Photos...

Photo Album: Housewarming

Sun, 13 Apr 2008 16:30:24 GMT

Housewarming

IMG_2098

IMG_2099

IMG_2105

IMG_2121

IMG_2122

IMG_2123

IMG_2124

IMG_2125

IMG_2126

IMG_2127

More Photos...

Photo Album: 張敬軒演唱會 April 6, 2008

Sun, 06 Apr 2008 17:45:27 GMT

張敬軒演唱會 April 6, 2008

IMG_1778

IMG_1786

IMG_1799

IMG_1802

IMG_1803

IMG_1807

IMG_1810

IMG_1811

IMG_1812

IMG_1813

More Photos...

Photo Album: My New Home

Fri, 28 Mar 2008 08:55:18 GMT

My New Home

IMG_0013

IMG_0022

IMG_0024

IMG_0026

IMG_0027

IMG_0028

Photo Album: 多謝晒Eva

Fri, 28 Mar 2008 08:45:39 GMT

多謝晒Eva

IMG_0030

IMG_0031

IMG_0032

IMG_0033

IMG_0034

IMG_0036

IMG_0037

IMG_0038

IMG_0039

IMG_0040

More Photos...

Photo Album: Eva Farewell ~ wish u all the best

Mon, 17 Mar 2008 14:36:08 GMT

Eva Farewell ~ wish u all the best

100_2058

100_2059

CIMG4866

CIMG4868

CIMG4871

CIMG4872

RIMG0002

RIMG0006

RIMG0007

RIMG0008

More Photos...

Photo Album: BK聖誕Party2007

Mon, 24 Dec 2007 16:06:45 GMT

BK聖誕Party2007

IMG_1517.jpg

IMG_1520.jpg

IMG_1522.jpg

IMG_1525.jpg

IMG_1547.jpg

IMG_1549.jpg

IMG_1552.jpg

IMG_1557.jpg

IMG_1564.jpg

IMG_1576.jpg

More Photos...

Photo Album: Cambodia & Vietnam 2007

Wed, 05 Dec 2007 16:33:13 GMT

Cambodia & Vietnam 2007

IMG_0693

IMG_0699

IMG_0705

IMG_0707

IMG_0732

IMG_0737

IMG_0758

IMG_0764

IMG_0765

IMG_0778

More Photos...

Photo Album: 2nd HKRunners Half Marathon

Mon, 02 Apr 2007 03:53:34 GMT

2nd HKRunners Half Marathon

004a

005a

007a

009a

010a

014a

015a

018a

019a

020a

More Photos...

Rainsipper's space

打死都唔做運動員

是日妙問妙答 - 智破唔守規舉阿嬋

Toe Concert @ Grappa's Celler

無人的演奏

悼程老先生

是日戰況：老本夠用

炎夏中令人感動的網球

是日戰況：法證先鋒真人版

是日戰況：三號波照跑

是日戰況： 邪

是日戰況：不顧一切的跑

黑雨

是日戰況：Fear Factor

妙問妙答之騎呢小學同學篇

Show Report: Keren Ann Live in Hong Kong - 以聲繪影

是日戰況：散跑王

想念都江堰

Medical Treatment

是日戰況：Die for Free Magazine

是日戰況：我要做Yawns

Photo Album: Beijing 2008

Photo Album: Housewarming

Photo Album: 張敬軒演唱會 April 6, 2008

Photo Album: My New Home

Photo Album: 多謝晒Eva

Photo Album: Eva Farewell ~ wish u all the best

Photo Album: BK聖誕Party2007

Photo Album: Cambodia & Vietnam 2007

Photo Album: 2nd HKRunners Half Marathon

是日戰況：邪